RFA/Sok Serey
ព្រះសង្ឃ នៅវត្តសាមគ្គីរង្សី ស្ថិតនៅខណ្ឌមានជ័យ រាជធានីភ្នំពេញ តវ៉ាជំទាស់ទៅនឹងសេចក្ដីប្រកាសតែងតាំងព្រះចៅអធិការថ្មី ព្រះនាម ឃិន វាសនា នៅថ្ងៃទី២១ ខែតុលា ឆ្នាំ២០១០។
ការសម្ដែងការប្រឆាំងដោយកំហឹងនេះ បានធ្វើឡើងនៅក្នុងវត្តសាមគ្គីរង្សី ក្រោយពីមានការប្រកាសតែងតាំងព្រះចៅអធិការថ្មី ថែមទាំងមានការទូងស្គរធំ វាយជួង និងស្រែកជំទាស់ផង។
ប្រធាន មិត្តសមាគមខ្មែរកម្ពុជាក្រោម លោក ថាច់ សាង បានមានប្រសាសន៍នៅក្នុងការតវ៉ានោះថា លោកមិនអាចទទួលយកបានទេចំពោះការតែងតាំងចៅអធិការថ្មីនេះ ដោយសារព្រះចៅអធិការថ្មីនេះមិនមែនជាខ្មែរកម្ពុជាក្រោម ព្រោះលោកយល់ថា ព្រះចៅអធិការថ្មីអង្គនេះនឹងមិនបម្រើផលប្រយោជន៍ឲ្យខ្មែរកម្ពុជា ក្រោម។
លោកបន្តថា ៖ «គេលបធ្វើ គេអត់ឲ្យយើងដឹងទេរឿងនេះ ហើយលិខិតខ្ញុំទៅដល់ក្រសួងធម្មការ មានសមាគមទាំង ១០»។
ព្រះភិក្ខុ សង្ឃខ្មែរកម្ពុជាក្រោម ព្រះនាម សឿង ខាង ព្រះជន្មាយុ ២៣ព្រះវស្សា នៅក្នុងចំណោមព្រះសង្ឃតវ៉ាជាច្រើនអង្គទៀត បានមានព្រះថេរដីកាថា ការតែងតាំងនេះមិនបានឆ្លងកាត់ការពិគ្រោះ និងយល់ព្រមពីព្រះសង្ឃខ្មែរកម្ពុជាក្រោមទេកន្លងមក ៖ «ពីព្រោះអីយើងបានជ្រើសរើសហើយ មិនបាច់ចាំអ្នកដឹកនាំមកសម្រុះសម្រួលនៅក្នុងទីនេះទេ»។
កាល ពីថ្ងៃទី១៩ ខែតុលា កន្លងទៅ សមាគមខ្មែរកម្ពុជាក្រោមចំនួន ១០ ដែលមានទីស្នាក់ការនៅកម្ពុជា បានដាក់ញត្តិរួមគ្នាទៅក្រសួងធម្មការ និងសាសនា និងសង្ឃនាយក ដើម្បីសុំឲ្យមានការតែងតាំងព្រះចៅអធិការថ្មី នៅវត្តសាមគ្គីរង្សី ជាខ្មែរកម្ពុជាក្រោម ក្នុងបំណងដើម្បីរក្សាអត្តសញ្ញាណខ្មែរកម្ពុជាក្រោម ពីព្រោះវត្តសាមគីរង្សី គឺជាវត្តតែមួយគត់នៅប្រទេសកម្ពុជា ដឹកនាំដោយព្រះអធិការខ្មែរកម្ពុជាក្រោម ព្រះសង្ឃ យឿង ស៊ិន ដែលបានសុគតទៅកាលពីថ្ងៃទី២៨ ខែកញ្ញា កន្លងទៅ ដោយរោគាពាធ។
មន្ត្រី សង្ឃចំនួន ៤អង្គ មកពីមន្ទីរធម្មការរាជធានីភ្នំពេញ និងមន្ទីរធម្មការខណ្ឌមានជ័យ និងមន្ត្រីអាជ្ញាធរដែនដីមួយចំនួនទៀត បានមកប្រកាសសមាសភាពសង្ឃដឹកនាំបណ្ដោះអាសន្ននៅវត្តសាមគ្គីរង្សី នៅថ្ងៃទី២១ ខែតុលា។
សមាសភាពសង្ឃដឹកនាំទាំងនោះ មានទី១ ព្រះភិក្ខុសង្ឃ ឃិន វាសនា ជាព្រះចៅអធិការ ឬប្រធានដឹកនាំ ទី២ ព្រះភិក្ខុសង្ឃ រិត លឹម ជាអនុប្រធាន និងទី៣ ព្រះភិក្ខុសង្ឃ ថាច់ សុវណ្ណារ៉ា ជាសមាជិក ដែលមានតួនាទីដឹកនាំវត្តសាមគ្គីរង្សីតាមធម្មវិន័យ គោរពតាមការណែនាំរបស់ក្រសួងធម្មការ និងសាសនា សហការជាមួយអាជ្ញាធរមូលដ្ឋាន និងការទទួលព្រះសង្ឃនានាឲ្យស្នាក់នៅក្នុងវត្ត ត្រូវតែមានការយល់ព្រមពីមន្ត្រីសង្ឃនៅមូលដ្ឋាន។
ព្រះ ភិក្ខុសង្ឃព្រះនាម ឃិន វាសនា ព្រះជន្មាយុ ២៩ព្រះវស្សា ដែលកំពុងរងការប្រឆាំងជំទាស់មិនឲ្យធ្វើជាព្រះចៅអធិការនោះ បានមានព្រះថេរដីកាថា ព្រះអង្គមិនមែនជាខ្មែរកម្ពុជាក្រោមទេ។ ការតែងតាំងនេះព្រះអង្គមិនបានដឹងជាមុន។ ព្រះអង្គបានសន្យាថា នឹងបន្តអនុវត្តតាមគន្លងនៃការដឹកនាំរបស់ព្រះចៅអធិការ ព្រះសង្ឃ យឿង ស៊ិន។
ព្រះភិក្ខុសង្ឃព្រះនាម ឃិន វាសនា មានថេរដីកាបន្តថា ៖ «ប្រៀប បី ដូចជាមនុស្សអត់ដឹងខ្លួន ចម្រើនពរ។ ការបដិសេធអីនោះ អាត្មាអត់មានជំទាស់អ្វីទេ ពីព្រោះអាត្មាក៏ជាមនុស្សអត់ដឹងអីដែរ»។
គ្មានអំពើ ហិង្សាណាមួយ ឬមានការចាប់ឃាត់ខ្លួនទេ នៅគ្រាដែលអាជ្ញាធរមូលដ្ឋានបានចុះមកតាមដានការតវ៉ានោះ ហើយមន្ត្រីសង្ឃ និងមន្ត្រីមន្ទីរធម្មការ និងសាសនានៅមូលដ្ឋាន ដែលបានចូលរួមជាអធិបតី ក៏បានរូតរះចេញពីវត្តសាមគ្គីរង្សីនោះភ្លាមៗដែរ៕
0 comments:
Post a Comment